Эндопротездеу бөлімшесі

2012 жылы Алматы қалалық клиникалық ауруханасы №4 базасында Қазақстан Республикасы халқының жарақаттану және ортопедиялық көмегін қамтамасыз ететін денсаулық сақтау ұйымдары туралы ережеге сәйкес эндопротездеу бөлімі ашылды.

Бөлімнің жабдықталуы және мүмкіндіктері

Бөлім құрамына үш операциялық зал кіреді, олар ортопедиялық үстелдермен, орталықтандырылған оттегі беретін стационарлық консольдермен және вакуумдық аспиратормен жабдықталған. Біздің операциялық залдар ірі буындарды (жамбас, тізе, иық) эндопротездеу бойынша әлемдік стандарттарға толық сәйкес келеді.

Эндопротездеу бөлімі 31 төсекке есептелген және 2, 3, 4 төсектік палаталардан тұрады. Мұнда жамбас, тізе, иық және шынтақ буындарын ауыстыру бойынша жоғары мамандандырылған медициналық көмек көрсетіледі. Сонымен қатар, ірі буындардың эндопротездерін толық немесе ішінара ауыстырып, қайта қарау операциялары (ревизиялық эндопротездеу) жүргізіледі.

Жыл сайын ірі буындарды (әсіресе жамбас және тізе буындарын) эндопротездеуді қажет ететін пациенттердің саны артып келеді. Бөлім Алматы қаласының тұрғындарына ғана емес, сондай-ақ жоспарлы түрде «Госпитализация бюросы» порталы арқылы Қазақстанның түрлі өңірлерінен келген пациенттердің 40-50%-ына қызмет көрсетеді.

Бөлім 2012 жылы ашылғаннан бері 13 жыл ішінде 19 000-нан астам науқас ем қабылдады.

Қолданылатын технологиялар мен материалдар

Біз әлемдік өндірушілердің заманауи шығыс материалдары мен эндопротездерін қолданамыз. Олардың тиімділігі ауқымды клиникалық зерттеулермен дәлелденген. Емдеу тактикасы Қазақстан Республикасының диагностика және емдеу хаттамаларына, сондай-ақ соңғы халықаралық стандарттарға сәйкес жүргізіледі.

Эндопротездеу әдістері үнемі жетілдіріліп, әлемдік ғылыми зерттеулердің және көпорталықты рандомизацияланған сынақтардың нәтижелеріне негізделеді.

Мамандардың біліктілігі

Бөлімнің дәрігерлері Австрия, Швеция, Литва, Польша, Ресей, Қытай, Франция, Италия, Испания, Нидерланд, Германия және АҚШ елдерінде біліктілігін арттырған. Сондай-ақ, халықаралық шеберлік сабақтарына белсенді қатысады.

Бөлім дәрігерлері Қазақстан Республикасы травматологтар және ортопедтер қоғамының, Қазақстан Республикасы травматологтар қауымдастығының мүшелері болып табылады.

Қызметтер

Эндопротездеу бөлімінде келесі хирургиялық араласулар жүргізіледі:

• Жамбас буынының толық эндопротездеуі – жоспарлы және шұғыл тәртіпте.
• Тізе, жамбас және иық буындарының толық эндопротездеуі – жоспарлы тәртіпте, соның ішінде әкімшілік квота бойынша.
• Тізе және жамбас буындарының ревизиялық эндопротездеуі.