Алматы №4 қалалық клиникалық ауруханасының жетістіктері Қазақстандық рекордтар кітабына енгізілді.

Бұл басылымның денсаулық сақтау бөлімі алматылық травматологтар Орталық Азия елдерінің ішінде бірінші болып тізе және жамбас буындарын ауыстыру бойынша робот-ассистенттеген оталар жасағанын атап өтеді. Дәл осы жетістік Рекордтар кітабының бетіне жол ашты. 2023 жылы Алматы Төртінші қалалық ауруханасында Stryker компаниясының роботы алғаш рет қолданылды. Бұл робот отаға дейін жасанды буынды дәл 3D-жоспарлап, импланттың оңтайлы өлшемін, оның орнатылу орнын дәл анықтайды. Биылғы 11 ай ішінде Алматы №4 қалалық клиникалық ауруханасында 1,8 мыңнан астам буын ауыстыру отасы жасалды.

Қазақстандық ақпараттық-энциклопедиялық анықтамалыққа (ҚАЭА) адамдардың рекордтық жетістігі, бірегей табиғи құбылыс, мәдениет, саясат, денсаулық сақтау, архитектура, спорт және туризмде Қазақстанның көрнекті жетістіктері енгізіледі. Бұған пилоттық жоба, түрлі қоғамдық құбылыс пен оқиғаның қалыптасу қайнар көзі, рекорд кіреді.

Қазақстандық рекордтар кітабы елдегі рекордтық жетістіктер туралы ең беделді энциклопедиялық басылымның бірі. Анықтамалық жаңарту әр 2-4 жыл сайын жарияланады.

Гиннес рекордтар кітабынан айырмашылығы, мұнда абсурдты немесе денсаулыққа зиянды рекордтар тіркелмейді.